上年介紹1941年香港保衛戰時，有史友就留言問阿史做乜唔介紹同期嘅新加坡戰役（又稱新加坡保衛戰）。諗返轉頭，又真係無講過呢場咁重要嘅戰役，的確需要介紹下。
1941年日軍發動「南方作戰」，呢個作戰計劃係日軍一方面突襲珍珠港，以消滅美軍嘅太平洋艦隊主力，同時揮軍進攻菲律賓、香港、馬來半島以及關島等地，目的係為咗佔據東南亞一帶，奪取石油等天然資源。1941年12月8日日軍入侵馬來半島，當時駐守馬來亞嘅英聯邦軍部隊頂唔住日軍嘅攻勢，响一月尾撤退到新加坡。
當時新加坡係英國响東南亞地區嘅政治經濟中心，極具戰略價值，响1942年2月8日日軍就揮軍入侵新加坡。當時英聯邦軍兵力有大約85000人，兵力响日軍之上。不過，受日軍聲東擊西戰術影響，英軍錯估日軍主力會响新加坡東北部登陸，於是將守軍集中咗响東北部，結果日軍率先响西北部登陸，繼而進軍新加坡中部，亦因為咁東北部守軍被迫後撤，令日軍可以從東北部登陸。响2月15日，駐新加坡英軍最高指揮官白思華眼見守唔到新加坡，於是向日軍投降，新加坡淪陷，開始咗三年幾嘅日佔黑暗歲月。响呢段期間，日軍向當地華人進行肅清大屠殺，估計數以萬計華人被殺。